Basilek dipangka
padang, bagaluik diujuang karieh, kato salalu baumpamo, rundiang salalu
bamisalan. (Pepatah, petitih,
mamang, bidal, pantun jo gurindam Adat Minang Kabau, selalu mampunyoi arati nan tasurek jo tasirek atau bakieh)
Bakato sapatah dipikiri, bajalan salangkah madok suruik. (Satiok nan ka dikatokan sahandaknyo dipikiakan labiah dahulu, sahinggo kato kito indak manyingguang urang lain)
Bajalan paliharolah kaki, maliek paliharolah mato.(Menuruik adaik bajalan jo maliek, sahandaknyo satiok garik jo parangai diingek taruih, jaan sampai marusak parasaan urang lain)
Bukik putuih rimbo kaluang, dirandang jaguang dihanggusi.
Hukum putuih badan tabuang, dipandang gunuang ditangisi. (Urang nan bapantun manjalang ka dihukum karano malawan Bulando)
Camin nan tidak namuah kabua, palito nan tidak kunjuang
padam. (Ajaran Adat/Syarak di Minangkabau tatap ka dihormati dek masyarakaik)
Cadiak jan bambuang kawan, gapuak nan usah mambuang lamak,
tukang nan tidak mambuang kayu. (Dalam bagaua sahandaknyo bisa mampagunoan kasado urang, jaan babuek surang walau awak santiang)
Condong jan kamari rabah, luruih manantang barieh Adat. (Dalam bagaua sahandaknyo puyo pandirian nan kuek dan dijalan nan batua)
Cupak basitalago panuah, undang maisi kandak, bak kain
pambaluik tubuah, paralu dipakai tak buliah tidak. (Adat jo Syarak di Minangkabau adolah duo ajaran nan mutlak dipakai dan diamakan.)
Capek kaki ringan tangan, capek kaki indak panaruang, ringan
tangan bukan pamacah. (Sifaik anak mudo nan tapuji jo disukoi dek adaik jo agamo di Minangkabau)
Cadiak malam biguang siang, gilo maukia kayu tagak.(Urang nan panjang angan-angan, namun indak dapek dikarajoan)
Cancang tadadek jadi ukia, kuah talenggang ateh nasi. (Suatu karajo nan indak disangko-sangko salah mangarajoannyo, namun dek kasantiangannyo manjadi elok kasudahannyo)
