1. Adaik Nan Sabana Adaik
Iko marupokan nan indak tapangaruah dek parubahan wakatu, tampek, jo kaadaan. Adaik nan barlaku sacaro parmanen ditangah masyarakaik Minangkabau. Sagalo ciptaan Allah SWT, nan dapek diliek, didanga jo dirasokan tamasuak kadalam adaik nan sabana adaik.
Contoh: api mambaka, aia mambasahkan, lawuik barombak, gunuang bakabuik, lurah baraia, murai bakicau, alang bakulik, kabau mangoek, jawi malanguah, ayam bakotek, buluah babuku, karambia bamato, tungguah bapanabangan, sungai baulu-bamuaro, dan banyak contoh lainnyo.
2. Adaik Nan Diadaikan
Mukasuik dari adaik nan diadaikan adolah adaik nan dirumuskan dek pimpinan datuak Parpatih Nan Sabatang jo Datuak Katumunggungan. Adaik ko alah manjadi aturan nan balaku sacaro turun temurun dari tuo - tuo dulu hinggo kini. Adaik nan diadaikan dirumuskan dengan caro maambiak katantuan-katantuan alam takambang jad guru, sasuai jo kaidah adaik nan babunyi:
Panakiak pisau sirawuik
kagalah batang lintabuang
silodang ambian ka niru
Nan satitiak jadikan lawuik
nan sakapa jadikan gunuang
alam takambang jadi guru
Mukasuiknyo adolah alam marupokan sumber ajaran. Nan disusun aturan-aturan nan manjadi kaidah untuak mangatur kahidupan masyarakaik dari sagalo bidang.
3. Adaik Nan Taradaik
Adolah aturan-aturan nan dibuek jo kato mufakaik dek pamuka adaik dek pamuka adaik satiok nagari di Minangkabau. Adaik nan taradaik marupokan kabiasaan nan alah ditarimo dek masyarakiak disuatu tampek. Buliah ditambah, buliah pulo dikurangi dan bahkan buliah pulo ditinggakan. Jadi adaik ko bisa barubah-rubah. Biasonyo bilo alah manjadi kasapakatan, urang nan malangga atau biaso disabuik malangga adaik dapek dianggiah hukuman, sasuai jo situasi kondisi nagari, mako bisa sajo satiok nagari malaksanaan babeda-beda. Walaupun babeda-beda, dasar hukum tatap samo sasuai jo pepatah: adaik sabatang, pusako sabuah.
Kondisi adaik nan taradaik dapek dicaliak dalam mamangan nan babunyi: kok dirantang namuah panjang, kok dikarek namuah singkek. Aratinyo katantuan adaik nan diadaikan bisa disederhonakan.
4. Adaik Istiadaik
Adaik istiadaik marupokan kalaziman nan balaku dalam satu nagari. Kalaziman iko biasonyo babeda di satiok nagari. Iko marupokan karagama nan dibuliahkan manuruik adaik minangkabau. Contohnyo adaik caro malaksanakan acara karamian saropu kasanian tradisional.
