Basuluah mato hari, bagalanggang mato rang banyak.
(Suatu masalah nan lah dikatahui dek masyarakaik banyak)
Baribu nan tidak lipuah, jajak nan indak hilang.
(Ajaran nan bakasan, nan lah ado dari dulunyo)
Bariak tando tak dalam, bakucak tando tak panuah.
(Urang nan baraso dirinyo santiang, tapi pado dasarnyo indak mangatahui)
Bajalan paliharolah kaki, bakato paliharolah lidah.
(Hati-hati dalam bakarajo jo mangecek, agak urang nan katasingguang)
Barek samo dipikua, ringan samo dijinjiang.
(Satiok karajo, dikarajoan basamo-samo, kok ado masalah salasaian basamo-samo)
Bakato bak balalai gajah, babicaro bak katiak ula.
(Urang nan bangecek atau bakarajo nan indak jaleh ujuang pangkanyo)
Bapikia kapalang aka, ba ulemu kapalang paham.
(Urang nan mangarajoan sesuatu indak bapedoman jo ilmu tantang pakaro tu)
Bak kayu lungga panggabek, bak batang dikabek ciek.
(Masyarakaik nan alah pacah balah, sulik untuak di peloki)
Batolan mangko bajalan, mufakat mangko bakato.
(Dalam masyarakaik indak buliah huduik mamancia, suatu pakarajaan harus di mufakaikan)
Bak kancah laweh arang, bapaham tabuang saruweh.
(Urang nan gadang ota, indak bisa marahasiokan nan patuik dirahasiokan)
