Makan Bajamba Katiko Muluik Nabi di Piaman

nusantaranews.net

Paringatan mauluik nabi Muhammad SAW di Minangkabau dibuek sasuai jo tradisi niniak moyang nagari satampek. Sarupo nan diadoan di Piaman. Daerah piaman hinggo kiniko masih banyak maadoan muluik disurau atau musajik nan acaranyo sampai sahari samala. Acaro mauluik ko dalam bantuak badikia. Biasonyo badikia dimulai dari tangah malam sapai sore.

Dalam acara mauluik ko, masarakaik manyadioan panokopi, lamang jo jamba. Panokopi untuk urang siak atau tamu di surau. Biasonyo diantaan sore sabalun mugarik. Lamang biasonyo untuak urang siak, tamu, jo ipa bisan dek urang nan mambuek dirumah. 

Sadangkan jamba dibuek untuak makan tamu jo urang siak basarato masyarakaik nan satampek. Mulai dari anak-anak, urang mudo, urang sumando sampai nan tuo-tuo.  Biasonyo jamba dibuek tiok rumah di kampuan dima surau atau musajik tu maadoan. 

Pakaro jamba nan dibuek dek induak-induak dirumah surang-surang tu caro maantaanyo babeda-beda tio kampuang. Ado nan babagi, sabagian rumah maantaan kasurau pagi ka ganti makan pagi dek urang siak atau tamu nan datang pagi sabagianlai maantaanyo siang kaganti makan siang. Ado pulo nasi jamba ko di antaan sabalum asar sodonyo. Dimakan sarentak dek sado nan datang, biasonyo lah di agak se dek urang kampuang atau undangan datang wakatu makan jamba. Sahinggo jumlah jamba takadang sampai tumpah kalua surau kalau masyarakaiknyo rami.

Biasonyo jamba ko sapasang, sadulang khusus samba sajo, sadangkan pasangnyo nasi yang diatoak atau dibungkuek ketek-ketek nan disusun diatenh singgan. Kalau undangan, masyarakaik rami sampai makan duo kali naik atau duo gelombang makan bajamba di acara muluik di piaman ko. Nan jaleh satiok nagari babeda caro makan bajambanyo.