Saluang Minang

Saluang adolah alaik musik nan dipadukan jo dendang pantun. nan tumbuah kambang di minangkabau. Alaik musik tradisional ko dimainkan dimano sajo. Lagu-lagu nan dimainkan marupokan lagu bagurau. Diantaronyo  Singgalang, biaso dijadian pambukak gurau. Isi pantun Singgalang sarupo barikuik ko:

Cupak panuah gantang balanjuang

Ka cupak urang ka tigo luhak 

Jatuah ka Alam Minangkabau 

Hanyo sambah salam dianjuang 

Rila jo maaf kami mintak

Ukua jo jangko kok talampau

Baringin di Pakan Akaik 

Di laman kantua nagari 

Dek yakin awak baniak 

Bagurau juo samalam kini 

Sasusah lagu ko dimainkan biasonyo panonton maminta lagu nan disukonyo. Jikok indak ado panonton nan mamintak lagu, biasonyo tukang dendang mamiliah surang lagu nan ka didendangkanyo. Mulai dari lagu bagurau sampai ka lagu jo pantun-pantun maratok.  Untuak panutuik gurau, biasonyo lagu nan di dendangkan lagu Jalu-Jalu: 

Pukua ampek dek lah datang

Jalu-jalu sobaik iko sajo

Awak baniyaik marantang panjang
Tuan baniyaik mangusuiknyo

Batu merah ambiak panembok 

Panembok sumua tampek mandi 

Barila-rila mangko ka elok 

Ibraik urang bajua bali

Mandaki kito mandaki 

Nan kalua ka jalan gadang

Gurau di siko dulu habisi 

Di lain hari nak kito ulang 

Sasudah pandendang malagukan Jalu-Jalu, aratinyo acara bagurau alah salasai. Biasonyo anggota tukang dendang ko batigo. Tukang saluang surang jo tukang dendang baduo urang. Kalihaian tukang dendang adolah manyusun pantun surang sasuai jo bahan gurauan katiko tu.