Asa Mulo Namo Nagari Pariangan

Ado namo ado curito. Asa mulonyo namo Pariangan, manuruik kaba nan didapek dari tambo-tambo nan ado, Paringan marupokan tampek sawah dibukak, tampek rumah gadang partamo ditagakkan. Niniak urang Minangkabau barasa dari  Banua Ruhum (bakeh wilayah Romawi). Namanyo Maharaja Diraja. Konon, nyo marupokan pangeran nan balayia dari  Banua Ruhum dan manapi di puncak Gunung Merapi nan wakatu dikaliliangi dek lauik. Dek keteknyo nan basobok wakatu nanpak dari jauh sahinggo kalua katu sajak gunuang marapi sagadang talua itiak. Gunuang marapi masih marupokan pulau ketek.

Bapuluah tahun sasudah itu, gunuang Marapi samakin gadang karano lauik samakin susuik. Dataran makin laweh. Naniak kito mulai marambah hutan.  Niniak  nan banamo Datuak Tantedjogarhano mabukak sawah jo satampang baniah. Mulailah urang basawah wakatu itu sahingga dinamoanlah  Sawah Gadang Satampang Baniah.  Hutan mulai dibukak, rumah-rumah mulai ditagakan. Masyarakaikpun makin banyak. Mako jadilah tampek tu nagari Pariangan. Asa namo Pariangan dari kato bariang-riang, atau basang-sanang.

Konon, itu marupokan ungkapan raso basyukur niniak kito wakatu tu. Karano dapek nagari nan subur dan sabana rancak. Nagari pariangan dikalilliangi dek bukik jo jurang. Kalau dicaliak dari ateh nagari Pariangan bantuak nagai an mangapuang di dalam jurang.

Disikolah partamo sakali rumah gadang ditagakkan. Bangunan ko dirancang lansuang dek  Datuak Tantedjogarhano. Disampiang tu dibangun pulo musajik. Kabanyo itulah musajik nan paliang tuo. Kini bantuak aslinyo indak nampak lai dek karano alah acok dipelokan. Namun kabanyo rumah gadang nan ado kini masih banyak nan asli nan umuanyo ado sampai ratusan tahun.